Palabra di Presidente di PWF Yanüari 2009
Ta un privilegio p’ami di por traha pa PWF, un fundashon bon organisá i respetá den nos komunidat. Nos ta bibando den un tempu di teknologia avansá i mi ta sumamente orguyoso ku nos por presentá bo e wèpsait aki, di manera ku tur informashon tokante kanser bo por haña sintá na bo kas i den bo mes idioma. Tambe bo por lesa tur loke PWF ta para p’e. Ta e intenshon pa nos informá bo ku regularidat tokante nos aktividatnan. Nos ta masha gradesido na Dragonfly Media ku a ofresé nos e oportunidat úniko aki gratuitamente.
Dia 16 di novèmber 2009 PWF ta kumpli 60 aña sirbiendo nos komunidat. Tur e trabou ku nos ta hasi, semper ta wòrdu hasí ku hopi amor i dedikashon na bienestar di tur e personanan, ku ta akudí na nos pa yudansa.
Kanser ta un malesa teribel i PWF ta hasi tur loke ta na su alkanse pa yuda aliviá doló di tur esnan ku tin mester di nos sosten durante nan malesa. Tambe e parti di informashon ta un di e metanan prinsipal di PWF, pa yuda konsientisá nos komunidat di tal forma, pa tur hende realisá ku detekshon tempran por yuda skapa nan bida.
Nos ta dediká hopi atenshon na konsientisashon di tur hende muhé riba kanser di pechu. Aña ku a pasa i e aña aki tambe nos lo duna atenshon speshal na nos skolnan sekundario. Tambe nos lo sigui ofresé nos klientenan, ku ta pasando e proseso di rekuperashon di kanser na pechu, un programa di “Un Estilo di bida Salu pa pashèntnan di kanser na Pechu”. Un danki speshal ta bai na nos prestigioso spònser “Astra Zeneca”, ku a kubri tur gastu di e proyekto aki.
PWF ta traha pa yuda realisá un Kòrsou mas salú! Nos ta konta ku bo sosten.
Kòrda ku bo salú ta un regalo divino ku bo a risibí di e ser supremo fo’i dia ku bo a nase, p’esei kòrda kuid’é na un manera speshal i keda semper bon informá.
Nos ta habrí pa tur komentario òf remarke. Bo por hasi esaki na e numbernan di telefòn menshoná den nos wèpsait.
Un saludo kaluroso,
Presidente di Prinses Wilhelmina Fonds
Yvonne Verbrugge-Neuman
