Boletin di Prensa "Teen Keep it Clean"

Korsou, 8 di aprel 2009

“TEEN KEEP IT CLEAN” UN PROYEKTO PA STIMULA KOMPORTASHON SALUDABEL SERKA NOS HOBENNAN

Prinses Wilhelmina Fonds konmemorando su 60 aña sirbiendo komunidat di Kòrsou, den koperashon ku Fundashon pa Maneho di Adikshon, Curacaosche Hartstichting i GGD ta bai inisiá un proyekto pa dediká atenshon speshal na nos hóbennan di awe, ku ta nos hende grandinan di mayan. Ta trata di e proyekto “Teen Keep it Clean”, ku tin komo meta prevení komportashon di riesgo serka nos hóbennan, ku por okashoná kanser serka nan den futuro. Via di e proyekto aki ke stimulá nos hóbennan pa nan bai pensa riba un forma mas kreativo riba nan komportashon di riesgo, ku por tin konsekuensha riba nan salú, manera entre otro humamentu, konsumo di alkohòl i droga, ku despues di tempu por duna nan kanser. E proyekto aki lo keda ehekutá huntu ku skolnan, di moda ku un grupo mas grandi posibel di hóben por partisipá na e proyekto, ku un resultado mas positivo. E proyekto aki ta finalisá ku un simposio ku lo keda tené den kuadro di “Dia Internashonal di Prevenshon di Humamentu” den luna di yüni 2009.

Ta e intenshon, pa kada skol apuntá un maestro, ku lo bai kordiná e proyekto “Teen Keep it Clean” na e skol. E maestro ta skohe un grupo di hóben ku ta dispuesto pa traha riba e proyekto. E proyekto ta dirigí riba hóbennan di 13 pa 18 aña i tin un durashon di mas o ménos 3 luna. A skohe pa e grupo aki, konsiderando ku na un edat hóben, te ainda nan por disfrutá di e benefisionan ku un bida saludabel ta brinda. Bibando un bida saludabel awor aki i den futuro, nan por evitá hopi malesa ku nan por bin sinti na un edat mas grandi.

Otro motibu ku a skohé pa e hóbennan ta, ku hubentut ta hopi independiente den nan akto. Nan mes ta disidí i determiná kiko nan ta hasi. Hopi biaha nan ta biba segun dia i no pensando den konsekuensha pa futuro, ademas sierto komportashon di riesgo den hopi kaso ta ser imitá dor di otro, ku por tin un konsekuensha aún mas negativo. Esaki ta hasi nesesario pa na un edat hopi hóben kuminsá stimulá e nesesidat i importansha pa nos hóbennan hiba un bida saludabel sin bisio, ku por afektá nan salú den futuro.

Proyekto “Teen Keep it Clean”
Ta p’esei tambe e nòmber di e proyekto “Teen Keep it Clean”. Den e proyekto aki e hóben mes ta tuma su desishon pa hiba un bida limpi saludabel, sin bisio. E intenshon ta, pa den luna di aprel i mei nos skolnan duna mas atenshon na humamentu, uzo di alkohòl i droga. E skolnan lo risibí un pakete di informashon ku puntonan práktiko ku nan mester tene kuenta ku n’e ora ta ehekutá e proyekto.

Un maestro di skol lo keda enkargá ku e proyekto na e skol, i mester forma un grupo di hóben pa traha riba e proyekto. E hóbennan aki lo mester bin huntu den grupo i diskutí ku otro, i traha riba un proposishon kon nan komo hóben, ta pensa ku por kambia e komportashon di riesgo serka nos otro hóbennan pa lokual ta prevenshon di humamentu, uzo di alkohòl i droga, den su relashon ku malesa i kanser.

Na final di e proyekto, e hóbennan mester presentá un obra den kua nan ta visualisá nan idea. E obra aki por ta den forma di un poster riba kua nan ta visualisá un mensahe. Òf nan por traha un jingle ku un mensahe òf un spòt pa televishon. Kada skol ta liber pa skohe e medio ku e ke uza.

Tur material mester keda entregá promé ku djabièrnè 22 di mei 2009 serka señora Sharine Bouthisma di Prinses Wilhelmina Fonds. Tur pintura, jingle i spòt di televishon lo keda evaluá dor di un hurado profeshonal, ku lo skohe e 3 mihó obranan den kada kategoria. E pinturanan lo keda eksponé for di 31 di mei te ku 7 di yüni 2009 den Biblioteka Públiko Kòrsou.

Den luna di yüni durante e simposio ku lo keda tené den kuadro di “Dia Internashonal di Prevenshon di Humamentu” lo saka i presentá e ganadónan di kada kategoria. Ta e intenshon pa uza e obranan aki komo material edukativo pa konsientisá otro hóbennan ku n’e. Lo traha un poster ofishal i repartí esaki na tur skol i otro lokalidatnan ku nos hóbennan ta frekuentá. Meskos lo traha un jingle ofishal di e material ganadó i pasa esaki na radio, meskos tambe ku e spòt di televishon. Banda ku lo uza e materialnan aki komo material edukativo, e skolnan ganadó lo risibí un premio dor di e organisadónan.

Prinses Wilhelmina Fonds, Fundashon pa Maneho di Adikshon, Curacaosche Hartstichting i GGD ta konvensí ku uzando un material traha dor di hóben pa hóben, lo por tin mas akseptashon i resultado mas positivo riba e komportashon di riesgo serka nos hóbennan.

Si tin skolnan ku ainda ke partisipá na e proyekto aki, nan por tuma Kontakto ku señora Sharine Bouthisma di Prinses Wilhelmina Fonds na telefòn 461-1998 òf 666-2323 òf via email cleanteen@pwf.an.