Tèstnan ku Dòkter lo Hasi si e ta Sospechá un Kanser
Esaki ta dependé di kiko bo kehonan ta i kiko e ta sospechá ku por ta falta bo. Pa kuminsá lo e skucha bo historia médiko, saminábo i mandabo laboratorio pa kohe sanger i orina. Kòrda bisa tur loke bo ta sinti.
Segun bo resultadonan sali, lo e determiná kua tèst mas lo bo mester hasi. Nos ta bai menshoná djis algun pasobra kisas bo no sa nada di e tèstnan ku tin awendia i lo bo ke ta un poko na altura. Si nan mandabo bai hasi e siguiente tèstnan no nesesariamente esaki ke men ku bo tin kanser. Awendia ta tèstnan rutinario ku nan sa hasi ku hopi hende pa por yega na un diagnósis korekto.
Ta eksistí diferente klase di ‘skopí’ pa listra paden di kurpa di hende. Ta trata di un tubu delegaritu i fleksibel ku un lus fuerte i un teleskop pegá na dje ku ta pèrmití un dòkter listra i hasi un diagnósis eksakto sin tin mester di pasa pa un operashon i un kòrtá grandi. Ku algun di e skopínan akí por asta tuma un biopsia di e tumor. Un biopsia, manera ya nos a menshoná, ta e prosedimentu kaminda ta saka un pida tehido òf un poko líkido di un tumor i ta samin’é bou di un mikroskop pa determiná si ta trata di un kanser òf si ta un otro enfermedat e pashènt tin.
Ademas di radiografia tin diferente forma di saka pòtrèt manera MRI, skèn di CT, skèn nuklear i ultrazonido (èko) ku ya nos a menshoná. Bèrdat ta ku nan ta demasiado diferente pa splika kada un separá i manera nos a menshoná kaba ta dependé di kiko bo ta sinti, kua tèst lo hasi ku bo. Ora ta asina leu bo dòkter mes lo splikabo tokante e tèst, i si e no hasié, abo mes por pidié splikabo kiko presis ta bai pasa.
Un biopsia ta e base mas sigur pa diagnósis di un kanser. Un onkólogo (esta un spesialista di kanser) ta insistí pa haña un muestra òf deskripshon di e tumor, promé ku e kuminsá ku tur tratamentu. Esaki yama un rapòrt di patologia. Basá riba e resultado di e patólogo, (e dòkter ku ta listra e biopsia bou di mikroskop) e onkólogo ta bai duna un tratamentu trahá pa kombatí e kanser spesífiko ku bo tin.
Den kaso ku nan diagnostiká bo kanser pafó di Kòrsou, ta masha importante pa bo bini ku e resultado di e biopsia òf di e operashon, (esta e rapòrt di patologia ku nos a kaba di menshoná). Sin esei difísilmente bo dòkter na Kòrsou por trata bo kanser optimalmente i ku éksito.
