Kanser ta un Enfermedat Peligroso?
Nos no por ninga ku kanser ta un enfermedat serio i peligroso. Prinsipalmente si bo no rekonosé e síntomanan ku por ta duna indikashon di un kanser na tempu. Di tur hende ku haña kanser mas o ménos mitar ta kura.
E kansernan mas frekuente pa hende hòmber na Kòrsou ta kanser na prostat, di kueru i na kolon-rekto. Pa hende muhé ta kanser na pechu, di kueru i na kolon-rekto.
Algun kanser ta mas kurabel ku otro. Por ehèmpel kanser na pulmon ta difísil pa kura, ora ku deskubrié ya hopi biaha ta lat kaba. En kambio, di 100 mucha ku haña leukemia (kanser den sanger) awendia alrededor di 75 ta kura.
Algun kanser ta difísil pa diskubrí – nan ta keda krese añanan largu i ta te ora un persona sintié hopi malu e ta haña sa ku ta kanser e tin. Ta di komprondé ku ta resultá mas difísil pa trata e enfermedat e ora ei, ya ku e ta den un estado avansá.
Pero tin otro sorto di kanser ku un persona un poko alèrt por rekonosé fásilmente i bai dòkter na tempu. Esakí ta pone ku por kuminsá pronto ku e tratamentu i e resultado por ta eksitoso . Esakí ta e kaso di kansernan di pechu i di kueru: bo mes por fula un pipita òf mira un mancha nobo riba bo kueru òf kambio den un skup’i Dios. E ora ei ta nesesario kuminsá ku tratamentu un be, pasobra esakí ta loke tur kanser tin en komun: nan no ta kura di nan mes, mester trata tur i mas lihé hasi esei, mihó. Nos ta konsehá lesa e kapítulo ‘Ocho motibu válido pa bai dòkter’ na página 3 de bes en kuando, pa bo keda alèrt i kòrda kua ta e síntomanan ku por ta duna un indikashon.
Un límite importante den siensia di medisina ta e límite di sinku aña: un hende ku kanser ku haña tratamentu i keda sinku aña sin ku e kanser rekurí (bini bèk) ta konsiderá kurá.
