Dolo Ora tin Kanser
Doló ta un fenómeno hopi kompliká. Kada hende ta eksperensiá doló di un otro manera. Si bo operá, ta mas probabel ku lo bo sinti doló. Esaki lo ta un doló agudo pero pasahero, despues di un par di dia ya no ta sintié mas. Tin doló króniko tambe, ku por ehèmpel hende ku ta sufri di artrítis ta sinti. Esaki ta un doló ku ta keda molostiá hopi tempu, sin ku e ke pasa.
Banda di e kousanan físiko, emoshonnan tambe ta hunga un ròl den sintimentu di doló. Si bo ta tenso, bo tin miedu, bo ta kansá òf deprimí, bo ta wòri riba kosnan ku mester hasi i bo ta sinti ku, manera bo ta awor, bo no por hasi nan, esaki tambe ta ponebo sinti laf: tur e pida pida kosnan akí por pone ku bo doló ta bira ainda mas grandi.
Ta p’esei nos ta konsehá pa buska un poko distraishon, bai dal un keiru kue airu fresku, bai bishitá un amigu (a) òf bisa nan pasa un ratu serka bo, bai tuma un baño na laman òf bai un sine, en todo kaso kita bo mente for di doló, no kòrda mes riba dje i lo bo mira kuantu ménos e ta bira.
E oranan ei ta bon tambe pa papia ku un hende pa desahogá bo mes pa bo no keda sintá ku bo preokupashonnan bo so ku bo so, sin ta mira solushon. E persona akí por ta un amigu (a), un bon konosí, un trahadó sosial òf un hende ku bo ta sintibo kómodo kuné.
Si bo papia riba doló ku bo dòkter no ta nifiká ku bo ta fèrfel’é ku bo problema, ku bo ta molosti’é pòrnada, al kontrario. Si bo no bis’é kiko bo ta sinti, e no por sa ku tin algu ta molostiábo, te pa e yudabo.
Tin hopi malkomprenshon tokante doló serka e pashènt ku tin kanser. Tin hende ta pensa ku no por duna remedi kontra doló asina e pashènt kuminsá keha un poko, pasobra mester lag’é sufri un poko promé. E argumento ta ku si e doló bira pió, no tin nada otro pa kombatié ke men no por duna e remedi for di awor. Pero siensia a bai mashá dilanti i awendia tin mashá tantu remedi kontra doló i no tin pakiko sufri! No kere ku tumamentu di e remedinan akí lo hasibo adikto tampoko.
Un di e konsehonan mas valioso ta pa bo siña kon ta dominá bo doló. Nunka no keda sin tuma un tablèt, pasobra bo ta haña ku na e momentu ku bo mester tum’é, bo no tin doló, i bo ta huzga ku bo no ke abuzá i na e momentu akí bo no tin mester di dje.
No tin nada mas robes pa pensa. Bo mester komprondé ku bo no tin doló awor, pasobra e tablètnan ku bo ta tuma a logra kontrolá e doló. E doló no a bai tur tur ainda, bo tin’é dominá na e momento akí. Komo bo ta tuma e tablètnan ku regularidat manera dòkter a manda, kada tantu ora, bo a logra kontrolá e doló, tantu ku na e momento akí bo ta sintibo bon, asina bon, ku bo no ta haña nesesario tuma e tablèt.
Pero no laga esakí gañabo. E sekreto pa kontrolá doló ta pa no lag’é lanta kabes.
Si dòkter a bisabo ku kada tantu ora bo por tuma e pastia, tum’é, maske na tal momentu bo no ta sinti doló. Nos ta ripití no keda sin tum’é. Awor si di repente bo haña hopi doló, no kere ku lo e pasa mas lihé si bo tuma e kantidat dòbel di loke dòkter a mandabo. No por hasi esei, ademas e por hasibo daño!
Nos konseho ta tuma bo remedi na ora, na e kantidat preskribí, pasobra bida sin doló ta masha dushi mes!
Nos ta spera ku nos a logra aklará algun kos tokante kanser pa bo. Si bo a keda ku pregunta yama nos libremente òf pasa na ofisina di Prinses Wilhelmina Fonds.
