Ocho Motibu Válido Pa Bai Dòkter





Tin ora hende ta sinti algu i e palabra kanser ta krusa nan mente. Nan ta pensa: bai dòkter òf nò; kisas no ta nada partikular ke men pakiko lo mi molostiá bai.  Tòg lo no ta nada partikular, ai si, lo e pasa di mes . . . . . .
Pero kanser ta un enfermedat ku no ta pasa di mes! Mester trat’é debidamente pa e kura. Kòrda semper ku miéntras mas tempran bo diskubrí un kanser, mas grandi bo chèns pa kura ta.

Ta mas ku klaro ku bo no ta bai dòkter pa kualke kos di kèns. Pero nos ke konsehábo ku si un keho ta pèrsistí òf ta bai bini kada bes òf kisas hasta bira pió, hasi un duru i bai konsultá ku un dòkter, maske kon insignifikante e keho ta parse.

Nos ta bai menshoná algun síntoma pa bo paga tinu.Tantu serka bo mes komo serka bo hendenan di kas. Opservá nan, kisas bo ta nota algu ku nan mes no ta konsiente di dje. Si bo nota algu ku ta parse sospechoso, no tarda, bai dòkter un be.

  1. garganta será (hers) òf tosamentu, tantu seku komo ku sleim, durante mas di seis siman. Un fèrkout ku no ta kita.  Hende ku ta huma mester ta alèrt semper, paga tinu si tin sanger den e sleim ora tosa.
  2. un herida, postema òf kalor ku no ta kura (sera) despues di 2 òf 3 siman.
  3. un frèt, lunar òf skupi di Dios nobo i kualke kambio den nan aparensia. E kambionan ku por nota ta: kambio di koló, krese bira grandi di repente, sangramentu, grawatashi konstante, sekreshon òf formamentu di postema.
  4. kehonan ora ta guli. Doló ora guli òf ora bebe bibida alkohóliko òf algu zür. Sinti ku kuminda ta keda pegá den garganta, ku e no ta baha fásil.
  5. un postema òf un pipita na pechu, na testíkulo òf kualke otro kaminda di kurpa, maske e no ta hasi doló, ta bon pa konsultá ku bo dòkter. Si durante di 3 / 4 siman tin un klir hinchá sea banda di bo garganta, den las, òf bou di brasa tambe laga listra esaki.
  6. pèrdida ápnormal di sanger fuera di kustumber. Esakí por ta un ilu di sanger den sleim ora tosa; sanger den sushi òf orina; sekreshon ku ta sali for di e punta di pechu; sangramentu vaginal òf sekreshon (friu) fuera di e periodo normal di regla. Sangramentu despues di menopousa òf ora tin relashon seksual.
  7. kambio duradero den kustumber di bai af. Tur hende tin nan mes patronchi, Si esakí kambia sin motibu i bo haña sea un habrimentu òf seramentu di kurpa ku no ke kita, si konsistensia di bo ‘sushi’ kambia bira manera poko pòtlot fini, delegá, no laga di splika i konsultá ku bo dòkter. Paga tinu semper si tin sanger den sushi.
  8. pèrdida di peso sin un motibu ku bo ta konsiente di dje, ke men sin tene dieta.

Un biaha mas, si bo tin un di e kehonan akí i e no ta pasa di su mes òf e ta ripití den un par di siman, tin un motibu pakiko mester bai dòkter mas pronto posibel.
 
Ora bo bai dòkter, splik’é bon kiko bo ta sinti i, si por, for di ki dia i ku kuantu frekuensia e ta molestiábo. Ta masha posibel ku no ta kanser, pero ta bo dòkter so por sakabo for di bo duda.