Eksperiensha di Voluntarionan

Señora Myrna Weiman ta un Voluntario di “PWF”. Ya pa vários aña Myrna ta kordiná e programa di aktividatnan di e fundashon. Un di e metanan di “PWF” ta, pa brinda pashèntnan e oportunidat pa nan por dibertí i entretené nan mes. “Tur djarason mainta ta duna terapia, ta tene charla, duna ehersisio, hasi bishitanan afó i siña nan kon ta traha obranan di man”, Myrna ta konta. “Si un Trahadó Soshal tuma nota ku un pashènt tin nesesidat di kompaño o divershon, e Trahadó Soshal ta reportá esaki" serka Myrna, pasobra pashèntnan sa kai den isolashon ku ta hasi difísil pa nan por tuma kontakto ku otro hende.

Nos a kuminsá ku e maintanan di djarason 25 aña pasá ku un grupo di 6 persona. Awendia e grupo aki a krese i tur siman bo ta haña un grupo di entre 30 pa 50 persona ta reuní. Mayoria ta hende muhé, ounke ku nos tin plan pa ekspandé nos aktividatnan tambe pa hende hòmber. Nos ta trahando duru pa disponé di un espasio mas grandi di moda ku nos por amplia nos aktividatnan. Nos intenshon ta, pa durante mas dia den siman organisá mas aktividat.

PARTISIPASHON TA GRÁTIS
Durante e enkuentronan e pashèntnan tin hopi kos pa hasi. Nan no ta sinta por nada. Nan ta siña traha mozaiek, obra di man, hunga karta i otro weganan interesante. Nan ta haña algu di bebe i kome. Pues tin posibilidat amplio pa nan soshalisá i dibertí nan mes. Tin biaha ta bende e obranan, ku na su turno ta trese entrada pa kumpra materialnan nobo. Partisipashon di e pashèntnan ta kompletamente grátis. E enkuentro semanal aki a bira masha popular. Myrna konosé tur e pashèntnan hopi bon, dor di su dedikashon na nan.

Pashèntnan ta hopi ansioso pa e enkuentronan di djarason. Ta un satisfakshon di mira, ku na promé momentu un persona no tin ningun interes pa partisipá, pero despues, tur djarason ku plaser ta keda bini. Bo ta mira esaki den e forma positivo ku e pashèntnan ta manifestá nan mes. Un kos ta sigur, e enkuentronan aki ta duna e pashèntnan hopi satisfakshon i a bira indispensabel den nan bida. Mester atribuí e éksito di e enkuentronan aki tambe na e entusiasmo di nos voluntarionan. Myrna ta hopi orguyoso i ta agradesido na e tím di voluntario ku e ta traha ku n’e. Ta personanan motivá i hopi dediká, ku ta hasi tur lokual ku ta nan alkanse pa hasi bida di e pashèntnan aki kontentu. Sin nos voluntarionan e kos aki no tabata posibel.

Señora Poppy Wawoe tambe ta un voluntario di “PWF”. Poppy mas tantu ta enkargá ku e parti di kolekta den “PWF”. Poppy ta hasi esaki vários aña kaba. “Mi no ta kòrda for di ki tempu, pero sigur entre 25 pa 30 aña mi ta yudando “PWF” ku su kolekta. Promé mi tabata yuda ku transporte di pashèntnan, despues direktiva a pidi mi pa yuda ku e parti di kolekta den luna di sèptèmber. Mi área ta Otrobanda. Mi ta bishitá pakusnan ku un karta di “PWF”, den kua ta pidi e doñonan pa duna un kolaborashon. Den hopi kaso, diferente tienda ta den man di mes un doño, lokual ta hasi ku e kolaborashon ta bira ménos. Pero, e trahadónan semper ta yuda ku algu di nan mes. Tambe mi ta bishitá Hospital i Obispado.

Poppy mes ta haña ku su aporte i e trabou di kolekta ku e ta hasi ta grandi i nesesario. “Kanser ta algu ku por afektá nos tur. Plaka nunka ta sufisiente den e lucha kontra di kanser. Tin tantu kos ku mester hasi i sosodé. Tin hende ku tin kanser ku no por traha, miéntras ku kosto di bida ta sigui subi. Ta p’esei ta importante pa komunidat ta na altura kiko “PWF” ta hasi ku e fondonan ku nan ta duna i ku esakinan ta wòrdu bon invertí. Mi ta sumamente kontentu ku e kampaña di informashon aki. Mi ta spera ku nos próksimo kolekta lo ta eksitoso. Mi gusta e trabou aki. Mayoria di hende konosé mi kaba, asina nan mira mi, nan ta bin kombersá ku mi, habri nan pòtmòni i duna mi nan kontribushon”, Poppy a bisa nan final.