Eksperiensha di Trahadónan Soshal

Señora Alejandra Wieske ta un di e sinku trahadónan soshal di “PWF”. Alejandra tin mas ku 15 aña ta traha ku “PWF” i ku plaser ta konta tokante su eksperiensha asina mas hende por mira e importansha di “PWF” den nos komunidat. Antes Alejandra tabata haña su trabou interesante, pero awe e ta konsiderá su trabou komo un nesesidat den komunidat.

Den e entrevista aki Alejandra ta papia na nòmber di tur su koleganan ku ta di mesun opinion, ku tin hopi kos ku mester drecha den nos salubridat, speshal pa pashèntnan di kanser di ménos rekurso. “Nos trabou prinsipal ta di duna guia siko-soshal i material na pashèntnan ku tin kanser. E ta parse fásil, pero den práktika ta otro kos”, Alejandra ta konta. “E ta duru for di prinsipio ora bo sera konosí ku un pashènt. E persona aki a kaba di risibí informashon ku e tin kanser, imaginá bo kon e ta sinti su mes n’e momentu ei. Mas lihé nos trata e persona, mihó nos por gui’é i dun’é sosten pa trankilis’é. E lo haña tur informashon tokante su malesa i e tratamentu ku e mester sigui.”

KONTAKO KU PASHÉNT
Ora topa ku un pashènt pa promé biaha, lo determiná su nesesidatnan ku n’e i kon lo sigui yud’é. E no ta bai fásil, ya komo ku no ta tur hende ta papia riba nan kosnan privá, ni riba nan malesa. Pero e Trahadónan Soshal, dor di nan eksperiensha, ta gana nan konfiansa i durante nan kombersashon ta yega na un plan di guia. E guia lo ta dirigí tantu riba kosnan material komo asuntunan ku tin di haber ku nan emoshon. Den e kaso aki lo traha riba un guia siko-soshal”.

”Hopi biaha e ambiente serka pashèntnan di ménos rekurso ta tristu. Tin un pobresa grandi i e situashon familiar tambe ta yen di problema. Tin pashènt ku no tin un seguro pa kubri nan gastu di malesa. No mester buska un aserkamentu práktiko pa nan problema, pa yuda nan ku nan emoshon”. Alejandra ta bisa desidido, “bo mester tin mas ku “100 man” pa traha komo un Trahadó Soshal na “PWF”. Bo mester sa kiko bo ta hasi i tin boluntat pa por kambia un situashon rondó di un pashènt. Den hopi kaso mester “bati pia abou” pa logra bo metanan, por ehèmpel pa un pashènt por risibí tratamentu na Hulanda, pasobra ta esaki ta su salbashon. Banda di hopi envolvimentu ku pashèntnan, un Trahadó Soshal mester por intermediá bon anto tin pasenshi. E no mester ta un hende ku stress, e mester tin konosementu di e instanshanan soshal. Ademas e persona mester por traha den oranan fleksibel. Den hopi kaso e mester sali den oranan lat di anochi pa bishitá un pashènt”, Alejandra ta informá.

Banda di yudansa práktiko e Trahadónan Soshal di “PWF” ta dediká hopi ora na duna guia i sosten durante e proseso di tratamentu. “E emoshon serka e pashèntnan ku a kaba di risibí un tratamentu di Kimo ta fuerte. Meskos tambe pashèntnan ku ta den e fase terminal. Ta nos deber pa prepará e pashènt i su famia tantu emoshonal komo práktiko den e fase tristu aki. Pero banda di momentunan doloroso “PWF” ta duna nos momentunan di alegria i satisfakshon, sigur ora bo mira ku un tratamentu a bai bon i ku un pashènt a sobrebibí”, Alejandra ta bisa.

Den último aña a bin hopi kambio. E “taboe” rondó di kanser a kuminsá disparsé. Komunidat ta mas konsiente rondó di kanser i ta akseptá, ku e malesa por afektá tur hende, riku, pober, hende grandi i chiki.  E desaroyo rondó di e tratamentu di pashèntnan a bira mihó, prinsipalmente si for di tempran determiná kanser serka un pashènt. Otro punto positivo ta, ku awendia dòkternan i hospital for di tempran ta tuma kontakto ku “PWF” pa referí un pashènt. E kontakto entre e Trahadónan Soshal i dòkternan a bira mihó, lokual ta na benefisio pa e guia di e pashèntnan.  “Ku tur e desaroyo positivo aki, ainda tin hopi kos ku por drecha”, Alejandra ta bisa. ”Tin hopi hende no sa kon nos sistema di salubridat ta reglá ni kon e servisionan ta hinká den otro. Nos ta kere ku e instanshanan konserní mester dediká i duna mas informashon tokante esaki, prinsipalmente riba e diferente seguronan i kiko un pashènt tin òf no tin derechi riba dje”.

Na final Alejandra ta bisa ku e ta hopi orguyoso di su profeshon i di ta traha pa “PWF”. “Tantu ami komo mi koleganan tur tin hopi satisfakshon di nos trabou. E ambiente ta dushi i amikal, nos relashon ta habri i semper kla pa yuda otro. Nos tur ku ta traha pa “PWF” ta sinti manera nos tur ta un famia di otro. Nos ta hasiendo un gran trabou humanitario”.