Ken nos ta Historia
Bou di e slogan “Un organisashon pa nos tur!” Prinses Wilhelmina Fonds ta inisiá un kampaña di informashon nobo. En konekshon ku su luna di kolekta den luna di sèptèmber, “PWF” ta haña importante pa komunidat por sera konosí mas di aserka ku e fundashon i ta na altura kiko e fundashon ta hasi pa e personanan riba nos isla, ku di un òf otro manera ta sufri di kanser.
Durante 8 siman, tur djamars lo publiká un artíkulo den korant splikando e ròl i responsabilidat di “PWF” den kombatimentu di kanser den nos komunidat. Lo sostené e kampaña aki ku un programa speshal di televishon i radio, den kua lo papia ku voluntario i trahadónan soshal di “PWF”. Lo tene entrevistá ku sobrebibientenan i tambe famia di pashèntnan di kanser. Den nos promé artíkulo lo trata historia i ròl di “PWF” den nos komunidat.
HISTORIA DI “PWF”
Prinses Wilhelmina Fonds a keda fundá dia 16 di novèmber di aña 1949. Dia su Mahestat Prinses Wilhelmina a entregá su korona, komunidat di Kòrsou a duna su Mahestat un regalo den forma di efektivo i su Mahestat na su turno a determiná, ku e ke pa uza e montante aki pa lanta un fundashon pa guia i yuda pashèntnan di kanser di ménos rekurso tantu na Kòrsou komo Antia Hulandes. Ku inisiativa partikular algun voluntario a lanta “Fundashon Prinses Wilhelmina Fonds” pa ehekutá e trabou aki. Konsiderando e oumento den e kantidat di pashèntnan di kanser, alabes e hecho ku hopi pashènt tin problemanan siko-soshal i soshal-ekonómiko, a profeshonalisá e servisio dor di empleá personanan kalifiká pa guia e pashèntnan i nan famia. Otro aña “PWF” ta selebrá su 60 aña di eksistensia, sirbiendo komunidat di Kòrsou den e lucha kontra di kanser.
“PWF” I KOMUNIDAT
“PWF” su kompromiso i responsabilidat den nos komunidat ta grandi. “PWF” ta duna yudansa i guia strukturá na pashèntnan. Banda di guia, “PWF” ta yuda ku transporte pa pashèntnan por pa bai dòkter i tuma terapia. “PWF” ta fasilitá pashèntnan entre otro ku kama, rolstul, andadera i krùk. “PWF” ta parti pakete di alimentashon salú na pashèntnan di ménos rekurso ku ta risibí kimoterapia.
E ta duna yudansa finansiero na pashèntnan di ménos rekurso i intermediá pa pashèntnan por haña un segundo opinion riba nan malesa. “PWF” ta produsí, repartí i fasilitá materialnan di informashon. Tambe e ta partisipá na marshenan di salú i duna charlanan na skol. “PWF” ta sòru pa rekreashon i sosialisashon di pashèntnan i ta organisá simposio, regla kursonan di rekapasitashon pa personal médiko i entre otro ta duna yudansa finansiero na instanshanan ku ta trata pashèntnan di kanser ku mester di yudansa.
PERSONAL DI “PWF”
“PWF” ta ser manehá pa un direktiva di 11 miembro ku ta risibí sosten di 6 konsehero médiko, tur voluntario sin sueldo. “PWF” tin tambe 13 persona den servisio permanente ku si ta risibí un sueldo. “PWF” su ofisina ta situá na Scharlooweg 52 ku telefòn 461-1998.
“PWF” PA TUR HENDE
Konsiderando e oumento di pashèntnan di kanser den nos komunidat, “PWF” a amplia su área di servisio i a habri su porta pa duna yudansa i guia na tur pashènt di kanser ku tin un nesesidat. Aktualmente tin mas ku 1.200 pashènt di kanser inskribí na “PWF”. Asina mes no ta tur pashènt den nos komunidat ta registrá na “PWF”. Ainda hopi hende no sa ku nan por aserká “PWF” pa informashon òf guia. “PWF” su meta ta, pa duna guia profeshonal na tur pashènt di kanser i tambe pa yuda konsientisá komunidat riba e diferente aspektonan di kanser.
