Kon PWF ta Finansiá su Aktividatnan

Señora Ageeth van Oosten ta tesorero di “PWF”. “Hopi hende no sa ta kon “PWF” ta yega na su fondonan. Via di e kampaña aki nos ke dediká atenshon na esaki. Kontrali na lokual hopi hende ta pensa, “PWF” no ta risibí supsidio. E fondonan di “PWF” ta bin dirèkt for di komunidat”, Ageeth ta splika. “For di suidadano ku ta duna un kontribushon, di donashonnan for di buzonnan durante entiero, di herensia di un persona ku a fayesé, di eventonan ku “PWF” ta organisá, kaminda ta paga un montante pa partisipá,. Un ehèmpel di esaki ta e konosido evento “Ride for the Roses”.

Tambe tin kampaña ku spònsernan ta finansiá, manera nos kampaña “Luna Blou”. Finalmente “PWF” tin su kolekta anual, ku ta tuma lugá den luna di sèptèmber. E nesesidat pa tene kolekta a bira hopi nesesario, despues ku e kantidat di pashèntnan di kanser a bin ta krese. “PWF” mester a sigui eksistí, komo tal mester a buska formanan pa a finansiá e fundashon su trabounan. Por lo general por bisa, ku ta komunidat di Kòrsou ta finansiá proyektonan di “PWF”. “PWF” ta tene un atministrashon responsabel di su fondonan i ta wòrdu kontrolá dor di un ofisina profeshonal”.

KIKO E KOLEKTA TA ENSERÁ?
“E preparashon pa tene un kolekta ta eksihí hopi”, Ageeth ta sigui bisa. “E ta kuminsá for di prinsipio di aña ku un petishon por eskrito, ku ta bai pa Gezaghèber. Despues durante e lunanan ku ta sigui, internamente ta traha riba un plan di akshon. Durante esaki ta evaluá resultado di e aña anterior i ta buska forma kon pa alsa nos entradanan. Tur kos a bira karu, e ta konta tambe pa e pashèntnan di kanser.

E aña aki a disidí pa aserka e asosiashon bankero, pa wak si nan kliente por hasi un donashon via di un retenshon fiho via di nan kuenta, e asina yama “standing order”. Klientenan por yena un formulario i duna òrdu na nan banko, pa kita un montante fiho tur luna for di nan kuenta i depositá esaki riba kuenta di “PWF. “PWF” ta hopi agradesido na e bankonan ku a mustra nan disponibilidat pa yuda den esaki. Nos ta spera ku hopi hende lo uza e sistema outomatisá aki pa kolaborá ku “PWF”. Dje forma aki nos ke garantisá nos entradanan i di mes plania nos aktividatnan mihó. Nos ta konvensí ku komunidat lo mira e importansha pa duna “PWF” un man”, Ageeth a bisa.

IMPORTANSHA DI KOLEKTANT
Miéntras tantu preparashonnan ta sigui pa realisá e kolekta klásiko via di e konosido buzonnan. “Nos a kuminsá ku aserká nos kolektantnan pa wak, si nan lo ke bolbe hasi esaki e aña aki. Den mayoria di kaso nan a bai di akuerdo. Nos tin un grupo di kolektant fiho, ku semper nos por konta riba nan. Un luna promé nos ta organisá un enkuentro speshal, durante kua ta interkambiá di idea kon pa mehorá e proseso di kolekta.

Kada kolektant tin su propio área kaminda e ta bishitá kompania, negoshi i organisashonnan pa un donashon. For di tempran nos ta kontrolá nos lista di negoshinan, pasobra nos ta aserká tur ku un karta personal. Tur kolektant tin su map ku informashon di e negoshinan i nan direkshon i nan ta bon identifiká. Despues ku e kolektant kaba ku su área e ta traha su relato. “PWF” no ta hasi kolekta partikular via di adrès. E kolekta públiko ta sosodé den lugánan públiko manera entre otro den supermerkado, na misa i botikanan. E trabou di nos kolektantnan ta duru. Bo mester tin hopi pasenshi i determinashon. “PWF” ta hopi agradesido na tur e voluntarionan ku ta yuda ku kolekta”, Ageeth ta bisa.

Inisio di e luna di kolekta a tuma lugá dia 21 di ougùstùs 2008. Esaki a sosodé via di un programa di televishon na Telecuracao. Durante un programa di 2 ora diferente médiko i speshalista a papia i duna informashon tokante kanser. E biaha aki a duna atenshon speshal na e viro di HPV, vakunashon i  kanser di matris.