Kanser den Wowo



KANSER DEN WOWO SA KORE DEN FAMIA

“Renoblastoma”, kanser na retina (den wowo) ta un tumor maligno na e retina ku generalmente ta afektá muchanan bou dje edat di 6 aña.

KOUSANAN
Kanser na retina na surgi ora ku un sèl di e retina ku ta kresiendo ta desaroyá un mutashon den e gene-RB, ku ta un gene ku ta suprimí kresementu di tumor. E mutashon aki ta tin komo konsekuensha ku e sèl ta krese for di kontròl i bira kanseroso.

Tin biaha e mutashon aki ta desaroyá asta serka un mucha ku tin un famia ku nunka a haña nan mes konfrontá ku kanser den wowo, pero tin biaha e mutashon ta presente serka diferente miembro di un famia. Si e mutashon ta kore den famia, ta eksistí un 50 porshento di chèns ku un persona afektá, su yunan tambe lo tin e. Esei ta pone ku nan lo ta na riesgo haltu pa desaroyá kanser den wowo.

Sea un òf tur dos wowo lo por keda afektá. Un vlèk blanku visibel lo por ser mirá den e pupil di wowo. E persona ku tin un wowo afektá lo por bira siegu i tambe e wowonan lo por bin parse skel.

E tumor lo por plama bai te den e kashi di wowo i tambe den selebre via di e nervio óptiko. Mester bisa si ku esaki ta un tumor ku no sa surgi hopi, eksepto den famianan ku tin e mutashon di e gene-RB.

SINTOMANAN
E síntomanan ku ta akompañá e tipo di kanser aki ta inkluí e.o.:

  • Un vlèk blanku ku por ser mirá den e pupil dje wowo.
  • Wowo skel
  • Wowo kòrá i ku ta hasi doló.
  • No por mira bon.
  • E íris (pretu di wowo) lo por haña un otro koló den kada wowo.

TRATAMENTU
E opshonnan di tratamentu ta dependé di e tamaño i unda e tumor ta lokalisá. Tumornan chikí por ser tratá ku laser. Radiashon i kimoterapia lo por ta nesesario si e tumor a plama sali pafó di e wowo.

Por resultá ku e wowo mester sa saká kompletamente si e tumor no ta respondé riba otro tratamentunan. Ta importante si pa buska tratamentu serka un spesialista ku tin eksperensia ku e tipo di tumor straño aki.

PRONOSTIKO
Si e kanser no a plama bai pafó di e wowo, kasi tur pashènt por ser kurá. Sinembargo, pa bo kura, e lo por rekerí tratamentu agresivo i asta sakamentu di e wowo pa e ta eksitoso.

Pero si e kanser a plama Sali pafó dje wowo, e chèns pa bo kura ta mas chikí i ta dependé kon e tumor a plama bai. E por a plama bai den selebre i otro partinan di e kabes, ku tur e konsekuenshanan ku esei por tin.