Kanser na Tripa
KANSER NA TRIPA POR KEDA SKONDI PA HOPI AÑA
Kanser na Tripa tambe sa ser yamá kanser di “colon”. E tipo di kanser aki no ta fásil pa trata, prinsipalmente pa motibu ku hopi biaha e ta ser detektá solamente na momentu ku e ta bon establesé i ku probablemente ya kaba el a plama bai leu den otro partinan di e kurpa.
Ta p’esei dòkternan ta urgí públiko pa ta mas atento di e señalnan ora ku tin problemanan ku tripa i raportá esakinan mesora. Sinembargo, kálkulonan ta mustra ku 9 for di kada 10 kaso di kanser na tripa detektá na tempu por ser tratá eksitosamente. Pero si una bes e kanser a plama bai pafó di e tripanan, e ta bira mas difísil pa trata.
Ketu bai siruhia ta keda lamentablemente e úniko tratamentu definitivo i kisas esun kurativo. I serka mitar di e pashèntnan ku hasi e operashon, e kanser ta bini bèk. Unabes ku pashèntnan presentá ku kanser na tripa, kual por keda skondí pa hopi aña, lo por tin sèlnan chikí i kanseroso ku lo por a plama pafó di e tripa.
SINTOMANAN
E problema ku síntomanan di kanser na tripa ta ku nan lo por ser kousá fásilmente dor di algu ménos peligroso. Nan ta:
- Sangramentu rektal;
- Un kambio den kustumber di bai af;
- Un sensashon ku bo tin di bai af aunke ya bo a kaba di hasié;
- Doló den barika.
E síntomanan ei no ta fuera di komun i lo por ta señal di algu hopi ménos serio. Sinembargo dòkternan ta konsehá pa, si e síntomanan ei keda pa mas ku un par di siman, pa buska atenshon médiko. Tin biaha un spesialista lo por hasi un saminashon rektal pa chèk si tin kambionan apnormal. Tin biaha e pashènt lo tin di hasi un colonoskopia. Esaki ta enserá hinkamentu di un slang te den e tripa. E slang tin un kámara chikí na su punta i asina e dòkter por mira e aria kanseroso den e tripa. E por ta un eksperensia inkonfortabel, pero masha poko biaha e ta doloroso.
Tin biaha ta usa un líkido spesial di kontraste pa e spesialista señalá kaminda tin kanser.
KOUSANAN
Nan ta kere ku tin un relashon genétiko den un kantidat chikí di kaso di kanser na tripa. Esnan ku un historial familiar lo tin mas chèns pa desaroyá e malesa.
Sinembargo, dieta ta un faktor klave segun sientífikonan a identifiká. Sigur dietanan tiki na fibra, haltu na vèt ta loke lo ta yuda hisa e grado di kanser na tripa. Pero hende ta ser stimulá pa kome hopi fruta i berdura, ya ku esaki ta parse di ta baha e riesgo. Un oumento di fibra den e dieta tambe lo tin un relashon ku redukshon di kasonan di kanser na tripa.
TRATAMENTU
E opshon prinsipal pa trata kanser na tripa ta siruhia. I si e malesa por ser detektá promé ku e plama pafó dje tripa, e chèns dje pashènt ta muchu mas grandi. Den e kasonan aki, tratamentu mas aleu lo no ta nesesario.
Pero si e kanser a plama pafó dje tripa, kimoterapia ta ser rekomendá. Tin biaha radioterapia ta ser apliká si e kanser no ta operabel, o sea pa hasi un tumor mas chikí pa fasilitá e operashon.
