Kiki ta un Stoma?
Stoma patiënten vereniging R.O.S.A.
Na 1991 e organisashon pa stoma pashèntnan a lanta na Kòrsou.
Un grupo di profeshonalnan a sinti e nesesidat pa lanta un organisashon ku por duna yudansa i guia na personanan ku a haña un stoma.
Fundadó di e organisashon ta dr. Sexto Sillé.
KIKO TA UN STOMA?
Hende no ke papia di un stoma. Esaki no ta straño komo ku e tin di haber ku sushi humano i / òf urina. Konseptonan ku ta un tabú pa hopi hende.
Ademas mayoria biaha kanser ta kousa pa haña un stoma, kual tambe ta un tema ku hende no ke papia di dje.
Stoma ta un salida artifisial riba barika pa sushi i/òf urina.
Stoma ta un palabra internashonal.
Despues di un operashon e sushi òf urina ta sali dor di un espasio spesial trahá riba barika.
Un saku di plèstik spesial ta konektá na e stoma i asina ta kolektá e sushi òf urina durante dia.
Téknikanan moderno den operashonnan ta pone ku tin kaso ku un persona por keda sin bisti e saku di plèstik permanente durante di dia i anochi. Si bo tin un stoma kontinente bo mester tin un bon disiplina pa kateris’é na ora. (e di dos plachi ta mustra kon e pashènt ta katerisá su stoma)
 |
Stoma kontinente |
 |
Ileostoma ta un stoma di tripa fini òf tripa chikitu. |
 |
Colostoma, ta un stoma di tripa diki òf tripa grandi. |
 |
Urostoma ta un stoma pa urina. |
Tin hende ku ta haña un stoma temporalmente. Esaki pa stimulá e proseso di sanamentu despues di un operashon.
Despues ta kit’é i e funshon di tripa ta sigui normal.
Hendenan ku haña un stoma, hopi biaha ta isolá nan mes.
Nan no ke sali mas, nan no ta forma parti mas na e bida sosial etc. etc.
Esaki no ta bon komo ku un hende asina ta bai sufri di soledat i depreshon.
P’esei nos tin RO.S.A.
Metanan di R.O.S.A.:
- stimulá un kondishon mas optimal posibel, tantu físiko, síkiko i sosial serka personanan ku un stoma.
- Kuido i guia promé i despues di operashon.
- Guia na pashènt i su famia.
- Regularmente R.O.S.A. ta plania kurso pa enfermeronan keda al tantu di téknikanan nobo riba tereno di kuido di un stoma.
Tambe R.O.S.A. ta organisá diferente aktividat pa su miembresia.
Banda di aktividat sosial ta inkorporá informashon médiko i informashon di kuido pa stoma.
Tur di dos djasabra di luna R.O.S.A. ta tene un enkuentro na
“clubhuis De Oleander”.
Aki pashèntnan ta topa ku otro, interkambiá di idea i eksperensia.
Importante ta pa abo ku tin òf ku por haña un stoma komprondé ku e stoma ta duna bo un segundo chèns di bida.
Bida ta bunita, hasi bon uzo di dje
