Kanser den Slokdarm
Bo esófago (slokdarm) ta forma parti di bo sistema digestivo. E ta e tubu ku ta konektá bo boka ku bo stoma. Múskulonan den e esófago ta pusha kuminda manda abou den e stoma durante e proseso di gulimentu.
Ta ser pensá ku humamentu i bebementu di alkohòl den forma eksesivo ta pone un persona na riesgo mas haltu pa desaroyá e kanser aki. Si e no keda deskubrí na tempu, kanser di esófago por plama bai na stoma, pulmon i igra, i tambe te den partinan serkano di e sistema limfátiko den bo kurpa, ku ta e klirnan di limfa. Desafortunadamente e forma di kanser aki ta un di esnan mas difísil pa trata.
Ta parse ku kanser den slokdarm i ku ta plama pa stoma ta kresiendo ku rapides den hopi dje paisnan den hemisferio oksidental. No ta muchu kla dikon esaki ta pasando.
Kanser ku ta hopi ariba den e esófago hopi biaha tin relashon ku humamentu di tabako i bebementu eksesivo di alkohòl.
SINTOMA
E promé señal di un tumor den e esófago ta generalmente na momentu ku surgi problema ku gulimentu. Bo por haña un sensashon doloroso ora ku e kuminda tin di bai abou, partikularmente si bo tin di guli partinan un tiki mas sólido di kuminda.
E doló ta ser kousá dor ku, na momentu ku e kuminda ta bai abou e ta rèk e esófago un tiki i huntu kuné tambe e tumor, i asina e ta kousa un blokeo parsial den e esófago.
Otro síntomanan ku lo por kondusí na un diagnóstiko ta inkluí kimamentu di stoma (heartburn), sakamentu frekuente i chokamentu. Un tèst ku lo por hasi pa detektá un ke otro ta endoskopia. Den e kaso aki ta pasa un pipa ku lus i kámara den e esófago pa wak kiko t’e problema.
TRATAMENTU
Desafortunadamente, detekshon tempran di kanser na esófago no sa sosodé pa motibu ku tumornan chikí kasi no ta duna síntoma.
Den hopi kaso, ora ya ta lat kaba, e tratamentunan ku ta ser ofresé ta mas bien pa alargá bida di e persona i aliviá su doló, na lugá di kura.
Siruhia ta un opshon klave. Hopi biaha e tumor ta ser saká huntu ku e klirnan di limfa. Ta kita e parti afektá dje esófago i pone un pida di tripa na su lugá. Lo por “bypass” e parti afektá tambe si e aria afektá ta muchu grandi. Tin e posibilidat tambe pa implantá un pipa spesial pa tene e esófago habrí.
Tin dòkternan ku tambe lo opta pa un dósis di radioterapia pa hasi e tumor chikí. Kimoterapia tambe ta un opshon, sea promé òf despues di operashon, pa eliminá sèlnan maligno ku por a keda atras.
