Kanser na Prostat
KIKO TA UN PROSTAT ?
Kurpa humano ta kontené varios klir. Un klir ta un órgano ku ta produsí un líkido determiná ku ta nesesario pa sistema di kurpa humano funshoná. Pa duna algun ehemplo: klirnan di nos wowo ta produsí lágrima, klirnan den nos boka ta produsí skupi, nos pánkreas (ku tambe ta un klir) ta produsí insulina.
Prostat, un klir di hende hòmber, ku ta lokalisá na garganta di blas, tambe ta produsí un líkido. Ora un hende hòmber saka naturalesa (bini kla òf ehakulá) su simia ta sali den e líkido ku su prostat ta produsí. Hormona ta un supstansha ku otro órganonan ta produsí. E hormonanan ku testíkulo di hende hòmber ta produsí tin influensha prinsipalmente riba tamaño di e prostat i e kantidat di líkido ku e prostat ta produsí. Segun edat subi, produkshon di hormonanan ta varia. Ekseso di hormona den sistema di un hende hòmber por kousa kresementu di prostat.
Prostat ta den parti abou di barika di un hende hòmber, na garganta di e blas di orina, entre e wesu di pubis i e delaster parti di tripa. E ta lora rònt di e tubo di orina. E echo ku e ta pasa rònt di e tubo di orina ta kousa problema di orinamentu ora e prostat krese òf bira grandi.
KANSER NA PROSTAT.
Promé indikashon di un kanser na prostat generalmente ta difikultat ku orinamentu. E siguiente difikultatnan por ta indikashon di un kanser na prostat, aunke mester bisa ku den mayoria di kaso e problemanan aki ta kousá pa síntomanan benigno, debí na faktornan ku sa presentá ora hende bira mas grandi. Den e kaso aki no ta trata di un kanser na prostat. Tòg mester ta konsiente ku no semper kanser na prostat ta presentá síntoma.
Aunke kanser na prostat generalmente ta presentá serka hende hòmber di 70 aña pariba, ta konsehabel pa un hende hòmber ku a kumpli 50 aña - aunke e no tin keho - hasi un chèkòp, ku ta inkluí un èksamen rektal, serka su dòkter un biaha pa aña. E èksamen aki ta un eksperiensha menos agradabel, ma tòg e ta mashá importante ora yega sierto edat. Komo ku e prostat ta situá na un lugá ku no ta sali riba pòtrèt, e úniko manera ku dòkter por samin'é pa sa si tin kualke duresa, ta dor di fula ku su dede kubrí ku un hanskun. Si ta nesesario e dòkter di kas lo referí e persona na un urólogo, ku lo hasi un echografia di e prostat i tuma un biopsia, esta saka un pida tehido pa laga saminá na laboratorio.
Oro un prostat hincha òf krese no ta probabel ku e kousa ta un kanser; mayoria di bia e kousa ta benigno. Esei no ta kita ku ta konsehabel pa konsultá ku un dòkter den kaso ku sinti un di e siguiente síntomanan:
- doló òf sensashon di kimamentu ora oriná;
- orina trubel òf sanger den orina;
- e orina ta tranka pa sali, ke men ta sinti gana pero e orina no ta sali;
- difikultat pa kuminsá oriná òf orinamentu ku frekuensha;
- un stral di orina swak òf ora ta oriná un stral ku ta para un ratu i bolbe kuminsá;
- un stral di orina partí na dos;
- doló di lomba òf den barika abou.
ALGUN OTRO OPSERBASHON
Ta konosí ku kambionan hormonal por produsí kanser na prostat. No tin muchu kos ku por hasi pa prevení esaki. Pesei ta masha importante pa un hende hòmber ta konsiente di e síntomanan ku nos a menshoná i segun edat subi, hasi un chèkòp ku regularidat.
Masturbashon no ta kousa kanser na prostat.
Kanser no ta pega; kanser na prostat tampoko. Esaki ta enserá ku un pareha no tin motibu pa tin miedo ora tin relashon seksual.
Un prostat ku a krese
Ku esaki nos a purba dunabo algun informashon tokante kanser na prostat.
Si ainda tin algu ta preokupábo, no laga di papi'é ku bo dòkter.
Ademas bo por akudí serka nos na Prinses Wilhelmina Fonds. Esaki ta un fundashon ku ta traha ekslusivamente pa yuda pashèntnan ku tin kanser.
Nos tin tres trahadó sosial den servisio ku semper ta dispuesto pa duna guia.
