Kanser na Igra

KANSER NA IGRA TA EKSIGI AKSHON NA TEMPU, SINO E TA MORTAL

Kanser na igra ta un malesa ku ta surgi mas tantu serka hende hòmber. Su nòmber sientífiko ta “Hepatocullular Carcinoma”.

KOUSANAN
Hepatocullular carcinoma ta konta pa 80 te 90 porshento di tur kaso di kanser na igra. E tipo di kanser aki ta surgi mas tantu serka hende hòmber kompará ku hende muhé, hopi biaha serka hendenan den e grupo di 50 pa 60 aña di edat. E malesa aki ta mas komun den regionnan manera Afrika i Asia.

E kousa di kanser na igra normalmente ta sikatrisashon di e igra. Sikatrisashon na su turno por ta kousa di hepatítis viral, na promé lugá hepatítis B i C, ekseso di alkohòl, algun malesa outoimuno seka e igra mes, i tambe oro malesanan ku ta resultá den inflamashon króniko di e igra. E kousa mas komun di sikatrisashon na igra ta ekseso di alkohòl.

Saminashonnan ku ser hasí ta mustra ku e igra ta mas grandi i delikado. Komo saminashon tambe por hasi un biopsy (saka un parti chikí ku un angua spesial), tèst di sanger, CT-scan, enzimanan di e igra por ta hopi haltu.

SINTOMANAN
Algun dje síntomanan mas komun den kaso di kanser na igra ta:

• Doló den barika, barika due, partikularmente parti drechi ariba.
• Barika ku ta hincha
• Bo ta sinti leshon i sangra hopi lihé.
• Koló bleek i wowo hel.

TRATAMENTU
Siruhia agresivo òf transplante di igra lo por ta eksitoso den tratamentu di tumornan chikí òf ku ta krese slow, si nan ser detektá na tempu.

Normalmente tratamentunan ku kimoterapia i radioterapia no ta muchu efektivo, aunke nan lo por se apliká pa redusí tumornan ku ta grandi pa asina e siruhia mes tin un chèns mas grandi pa éksito.

RESULTADO
Normalmente e resultado di kanser na igra ta pober, pa motibu ku ta solamente 10 pa 20 porshento di e sèlnan kanseroso lo por ser saká kompletamente ku siruhia. Si e kanser no por ser saká kompletamente, e malesa normalmente ta bira mortal denter di 3 pa 6 luna, aunke esaki tambe ta varia. Lo por sosodé ku un persona ta sobrebibí un periodo mas largu ku esaki.