Kanser na Blas
PASHENTNAN DI KANSER NA BLAS TIN UN GRADO HALTU DI SOBREBIBENSIA
Blas di urina, konosí komo “blas”, ta e saku/blas ku ta tuma tur urina ku ta ser produsí dor di e nirnan. E blas aki por ser enkontrá den e parti abou di bo barika. Hopi di e síntomanan di kanser na blas fásilmente lo por ser kousá dor di otro kosnan, pero dòkter ta bisa ku ta mihó hasi un bishita pa asina kualke tipo di kanser por ser detektá na tempu.
Pashèntnan ku topa ku un tiki sanger den nan urina mester hasi un chekeo. Si e kanser ta superfisial, e sobrebibensia pa tèrmino largu ta eksepshonal, pero e ta dependé si kon tempran e ser detektá. Si ta trata di un kanser invasivo, e chèns pa sobrebibensia ta chikí.
Si ta nesesario pa hasi siruhia radikal, esaki lo por tin efektonan pa tempu largu i inkumbiniente pa e pashènt, ta p’esei dòkter ta trata di evitá siruhia mas tantu ku ta posibel.
Pero ta importante pa pashèntnan haña e oportunidat pa diskutí riba otro alternativanan ku nan onkólogo. No opstante kanser na blas ta un di e formanan di kanser ku un alto grado di sobrebibensia. Sinku aña despues di diagnósis e pashènt ta na bida ainda.
SINTOMANAN
Mayoria di kasonan di kanser na blas ta loke nan ta yama “transitional cell carcinomas”, ku ta nifiká ku e kanser ta start den e sèlnan ku ta forma e lag/muraya paden di e blas. Tin di nan ku no ta keda detektá sino te ora ku nan plama den e lag aki i bai den e múskulo di e blas ku ta yuda ora di pèrs ora di saka urina.
Algun dje síntomanan komun di kanser na blas ta inkluí:
- Sanger den urina
- Doló durante urina
- Urinamentu frekuente òf gana di pishi pero sin por hasi esei.
Esakinan no ta señalnan definitivo ku tin presensia di kanser na blas, ya ku hopi síntoma manera esakinan por ta e.o. simpel infekshon ku por ser tratá ku antibiótika. Asta si tin un tumor ku ta kousando doló, e lo por ta benigno. Pa konfirmá òf ekskluí ku ta kanser, dòkter lo hasi un chekeo físiko kompleto i probablemente un saminashon sektal pa fula si tin presensia di tumor.
KOUSA
Meskos ku den hopi otro kaso di kanser, humadónan ta parse di tin riesgo mas haltu pa desaroyá kanser na blas, defakto 2 pa 3 biaha mas haltu. Pero sientífikonan no sa eksaktamente kon e malesa ta desaroyá su promé pasonan.
Tratamentu ta dependé te kon leu e kanser a plama. Si e ta superfisial, lo por apliká un prosedura relativamente simpel (Trans-Urethral Resection), pero si el a plama bai den e múskulo dje blas, lo mester hasi un operashon mas grandi. Den kaso ku e kanser a plama solamente na un parti di e blas, lo por kita e parti afektá (sisektomia parsial).
Si e kanser a plama mas tantu, lo ta nesesario pa saka henter e blas i otro órganonan den bisindario. Serka hòmbernan esei lo por nifiká nan prostat i serka hende muhé un parti di su sistema reproduktivo. Teniendo kuenta ku e blas no t’ei mas, lo krea un buraku spesial na barika (Stoma) pa e urina por sali. Ku téknikanan kirúrgiko moderno lo por remplasá e blas dunando e pashènt asina sierto grado di kontròl. Pero tambe dòkter lo por rekomendá radioterapia òf kimoterapia.
