Guia pa hende muhé ku a hasi un mastektomia
Na promé lugá propósito di e buki akí ta duna informashon i algun konseho na hende muhé ku a tende di nan dòkter ku nan tin kanser na pechu. Tambe e ta un guia ku ta duna indikashon i ehersisio pa e persona siña "rèk alkansá su rekuperashon". Ta konsehá pa partner i famia yegá di e persona ku a hasi e operashon, tambe lesa e buki pa nan por komprondé henter e situashon mihó.
Tin vários tratamentu ku dòkter por hasi ora e konstatá ku tin un pipita na pechu. Pa di promé por tuma un biopsia, esta ta saka un pida di e pipita i ta laga listr’é na laboratorio. Pa di dos por tuma un biopsia di e klirnan linfátiko (ku ta bou di brasa) o por saka nan kompleto. Tambe por saka e pipita, basta e no ta muchu grandi i konservá e pechu (tumorektomia). Generalmente ta saka e klirnan bou di brasa i e pipita. I por último por hasi un mastektomia o sea kita hinter e pechu. Ku tempu ta pusibel tambe rekonstruí e pechu, o sea ta traha un pechu nobo ku ta parse e otro pechu.
Tur e intervenshonnan médiko menshoná ariba por afektá mobilidat di bo skouru i brasa. Ke men maske e buki akí ta dediká mas tantu na yuda hende muhé ku a hasi un mastekomia, esnan ku a pasa den un di e otro eksperenshanan ei tambe por probechá di e ehersisionan pa rekobrá fleksibilidat di nan brasa i bolbe kuminsá ku nan aktividatnan diario.
BO KASA NO TA ÚNIKO
E pregunta: "pakiko ta nèt ami, pakiko m’a haña kanser?", ta pregunta ku ta surgi ku frekuensha serka esnan ku a hasi un mastektomia i mester a kita un pechu pa motibu di kanser. No tin un kontesta riba esaki ya ku siensia ainda no ta asina avansá pa nos por determiná kiko ta kousa kanser, ni kiko por hasi pa prevení kanser na pechu. Loke nos por bisa ta ku bo kaso no ta úniko.
Meskos ku abo, miles i miles di muhé rònt mundu a pèrdè i ta pèrdè un pechu pa motibu di kanser. Na Kòrsou so tin entre 50 pa 60 hende muhé ta hasi e operashon akí tur aña. Nos no ta menshoná esaki pa dunabo un konsuelo, nos ta konsiente ku bo problemanan no ta bira ménos ora bo tende esaki. E motibu pa menshon’é ta pa bo realisá ku no t’abo so ta pasando den e fèrdrit akí i ku kisas den bo mes serkania tin mas hende ta kompartí mes preokupashon i doló ku bo.
E forsa mas grandi ta den bo mes. Úniko manera pa bo logra un bienestar físiko i mental ta di para riba bo mes pia, i úniko manera ku bo por logra esaki ta di stima bo mes i stima bida. Siña stima bo mes, siña aseptá bo mes manera bo ta awor. Kòrda ku bo herida ta skondí, ningun hende no tin pakiko sa. T’abo mester disidí kiko bo ke pa bo amistatnan òf kompañeronan di trabou sa.Kisas esnan mas yegá n’abo ta poko skiu, poko straño. Nan ta warda mira kon bo ta reakshoná, pasobra nan no ke bisa òf hasi nada ku por molestiabo. Ora ta kestion di enfermedat hopi biaha nos no sa kon aktua. Muchanan di tur edat tambe por tin miedu i nan no sa kon ekspresá esaki.
E solo echo ku bo tabata na hospital ya ta kla pa spanta nan. Purba splika nan di un moda ku nan por komprondé e pakiko. Mustra nan ku bo stima nan mes tantu ku ántes i duna nan un chèns pa nan demostrábo nan amor pa bo ku kualke kos chikí. Laga nan malkriábo, trese un kòp’i te, yuda laba kos, limpia kas òf hasi un rospondi. Esaki ta konta pa tur hende rondó di bo. Laga nan sa kon kontentu bo ta di ta bèk na kas i kon gradisido bo ta ku nan ta preokupá pa bo. Lo bo ripará ku asina bo tuma e promé paso i habri bo kurason, tur hende rònt di bo lo sinti nan aliviá i lo ekspresá nan deseo di dunabo un man. Ta riba bo nan tabata warda.
