10 tips to Stop smoking
1. Keda para riba bo desishon
Stòp di huma ta un kos, pero keda sin huma ta un otro un kos. Sinti bo mes orguyoso di kada dia ku bo a logra ,
paga tinu riba e bentahanan di no huma. Asina bo ta keda motivá pa no mishi ku sigaria. Ta yega un momentu ku no ta
kosta bo molèster mas pa keda sin huma.
2. Opservá bo mes
Chèk bo beis; Si bo tin strès, bo ta tristu, rabiá òf desapuntá anto ta mas fásil pa kuminsá huma.
Yama un hende na telefon òf sali for di kas pero hasi algu pa bo no keda den e situashon.
3. Keda alèrta : rekonosé situashon difísil
Evitá situashon i /òf sitio den kual bo a kustumbrá huma, òf ku por lanta bo gana di huma.
Si bo ta konsiente di situashonnan di riesgo anto lo bo ta alèrta ora esakinan presentá.
Reflehá riba loke ta pone bo huma. Ta semper durante kombersashon ameno, reunion, hasimentu di aña, fiesta resepshon,
happy hour, komementu etc.? No ta fásil, pero purba keda por lo pronto leu for di e situashon òf sitionan ei.
4. Atendé ku situashon di 'krísis'
Bo sa huma semper despues di kome? Bai limpia djente mesora despues di kuminda.
Si bo ta rekompensá bo mes ku un sigaria despues di trabou duru, wak pa bo tin algu otro di smak den banda ei.
Pues sòru pa semper bo tin un alternativa pa momentu ku bo sa kustumbrá di huma. Lo ta bon pa bo no bai happy
hour un par di siman si bo sa ku ei e tentashon ta grandi.
5. Rekompensá bo mes
Si bo ta rekompensá bo mes pasobra bo a stòp di huma esaki ta duna bo mas forsa pa sigui den e bon kaminda.
Sigur awor ku bo ta riba e bon kaminda despues di hopi esfuerso. Kumpra algu di bo gustu manera un cd, paña,
òf un perfume dushi. Algu ku bo mes gusta. Tambe bo por duna bo mes elogio kada bes ku bo ku bo realisá ku bo no
a kai p'e sigaria. Bo tin tur motibu pa ta orguyoso di bo mes.
6. Fiha fecha pa stòp
E por ta mañan, e por ta kualke dia pero e mester ta un momentu ku bo por prepará pe. No keda skùif e fecha.
Disidí di stòp mesora, ta mas efektivo ku 'baha man'. Mayoria hende ku a stòp di huma ku éksito a stòp mesora.
Pone mas forsa tras di bo desishon dor di tira tur tabako, laiter i asbak afó pa nan no kòrda bo mes riba humamentu.
7. Laga sa ku bo ta bai stòp
Pone hendenan yegá na bo na altura di bo plan pa stòp di huma. Asina nan por sostené bo i fortifiká e promesa ku
bo a hasi na bo mes. Si bo haña mal beis ora bo stòp, bo famia por tin un mas komprenshon pa esei. Podisé tin
un persona ku ke stòp pareu ku bo. No konta esnan ku bo sa for di tempran ku nan lo no sostené bo òf ku asta lo
hinka bo den tentashon pa huma. Biba di dia pa dia. No pensa for di tempran ku nunka mas di bo bida lo bo no huma.
Bisa ku bo no ta huma awe. Mañan bo ta bisa bo mes meskos. Asina ta sigui un dia tras di otro sin bo huma i bo ta
logra bo meta tòg. Ta inútil prekupá ku problema di mañan kaminda ta esun di awe so bo por solushoná.
8. Kon manehá e gana di huma
Un di e promé kosnan ku bo ta ripará ora bo stòp ta e gana di huma. Bo por kompará e gana ei ku un ola.
E ta bin masha fuerte mes, yega su punto kulminante i ta baha bèk. Esaki ta dura algun minüt.
Despues di tempu ku bo a keda sin huma bo ta ripará ku e gana ta baha. Loke bo por hasi pa baha e gana
aki ta e.o.: bebe un glas di awa, kome fruta, hala rosea profundo i tené un ratu aden promé bo supla afó,
hasi algu ku ta eksigí bo atenshon kompletu, bai kombersá ku un hende, bai kana, kore baiskel... en todo
kaso drenta akshon!
9. Tuma un desishon firme
Esaki lo yudabo pasobra bo sa ku bo a sera e porta bo tras. Podisé bo konosé un hende ku a stòp i ku no
a mishi mas ku sigaria. Tum'é komo ehèmpel.
10. Pensa positivo
Keda pensa positivo durante momentunan difísil despues ku bo a stòp di huma. Pensa positivo i aseptá
ku ta tuma pasenshi. Sali pafó, dibertí i relahá bo mes. Sigui ku bo bida normal, sin humamentu.
